ليش الريل الواحد بيروح؟
الريل بياخد يوم: فكرة، نص، تصوير، مونتاج. وبعد 48 ساعة بينزل بالفيد وما حدا بيرجعله. بس الفكرة نفسها ما تعبت: اللي تعب هو الشكل. ونفس الفكرة بتنفع لناس بيقرؤوا كاروسيل، وناس بيقرؤوا ثريد، وناس بيفتحوا إيميلك، وناس بيشوفوا الستوري وما بيفتحوا الفيد أصلاً.
01
فكرة وحدة
نص الريل زي ما هو. بدون معلومة جديدة.
02
5 أشكال
كاروسيل، كابشن، ثريد، إيميل، ستوري. كل واحد بطوله وطريقته.
03
5 أيام
منشور باليوم، ونفس الكلمة المفتاحية بكلهم.
القاعدة اللي بتفرق: إعادة الاستخدام مش «نفس النص بخمس أماكن». هي نفس الفكرة بخمس أشكال. الكاروسيل بيقسّم، الثريد بيسرد، الإيميل بيحكي، الستوري بيلمّح. والبرومت تحت بيفرض هاد الفرق على Claude.
دقيقتين
بيشتغل بتطبيق Claude العادي (الموبايل أو المتصفح) وبـ Claude Code. ما بدك أي تجهيز.
1
البرومت: الصق نص ريلك تحته
بدّل اللي بين الأقواس المربعة، وبآخر البرومت الصق نص الريل (الكلام اللي بتقوله بالفيديو، أو الكابشن إذا ما عندك نص).
هاد نص ريل إلي. حوّله لـ 5 منشورات بنفس الفكرة، بلهجتي [الأردنية الخفيفة]، بدون أي معلومة جديدة مش موجودة بالنص، وبدون ما تخترع أرقام أو أسماء:
1. كاروسيل 8 سلايدات: سلايد 1 هوك أقل من 8 كلمات، سلايدات 2 لـ 7 نقطة وحدة بكل سلايد (أقل من 12 كلمة)، سلايد 8 دعوة بكلمة «[الكلمة]».
2. كابشن انستغرام: أقل من 120 كلمة، أول سطر هوك مختلف عن هوك الكاروسيل، وآخر سطر الدعوة بنفس الكلمة.
3. ثريد من 5 بوستات: كل بوست جملة أو جملتين، مرقّمة 1/ 2/ 3/ … البوست الأول لازم يوقّف القارئ لحاله.
4. إيميل للمشتركين: سطر موضوع أقل من 8 كلمات، 100 لـ 150 كلمة بأسلوب رسالة لصاحب، وتوقيع [اسمك].
5. ستوري من 3 فريمات: نص كل فريم أقل من 8 كلمات، وآخر فريم يوجّه للريل.
قواعد الكتابة: جمل قصيرة، بدون حشو، بدون «في عالم اليوم» و«بالتأكيد» و«من الجدير بالذكر»، وكل منشور ينقرأ لحاله بدون ما يحتاج الريل.
اعرضلي الخمسة تحت بعض بعناوين واضحة.
النص:
[الصق نص الريل هون]
- «بدون أي معلومة جديدة»: أهم سطر. بدونه Claude بيضيف نصايح وأرقام من عنده، وبتصير بتنشر إشي ما قلته.
- «هوك مختلف عن هوك الكاروسيل»: عشان اللي شاف الكاروسيل ما يحس إنه الكابشن نسخة.
- «ينقرأ لحاله»: الإيميل بيوصل لناس ما شافوا الريل. لازم يفهموه من الصفر.
- الكلمة المفتاحية: نفسها بالكاروسيل والكابشن والستوري، عشان الرد التلقائي يشتغل بكلمة وحدة على كل المنشورات.
2
المثال الحقيقي: من ريل الأمان
هاد اللي طلع فعلاً لما عطيت Claude نص ريل «خسر سنتين ونص من البيانات… بأمر واحد» (الكلمة: أمان). ما عدّلت ولا كلمة:
1 · الكاروسيل (8 سلايدات)
- خسر سنتين ونص من البيانات… بأمر واحد
- كان عم يخلّي Claude Code يرتّب السيرفرات
- ناقصه ملف صغير… فتنفّذ أمر حذف
- راحت قاعدة البيانات… ومعها النسخ الاحتياطية
- والمؤلم؟ Claude نصحه ما يعملها
- القاعدة 1: نسخة احتياطية قبل أي شي
- القاعدة 2: خلّيه يخطط… وإنت بتوافق · القاعدة 3: أي أمر حذف، اقراه بعينك
- اكتب «أمان»… وببعتلك إعدادات الأمان
2 · الكابشن
خسر سنتين ونص من بيانات منصّته… بأمر واحد 😨
القصة، و3 قواعد أمان قبل ما تشغّل Claude Code على مشروعك الحقيقي.
اكتب «أمان» 👇
3 · الثريد (5 بوستات)
- 1/ مهندس مشهور خسر سنتين ونص من بيانات منصّته… بأمر واحد نفّذه Claude Code.
- 2/ كان ناقصه ملف صغير بيعرّف السيرفرات. النتيجة: أمر حذف مسح قاعدة البيانات… ومعها النسخ الاحتياطية.
- 3/ والمؤلم؟ Claude نصحه من الأول ما يدمج المشروعين. هو كمّل.
- 4/ رجعت البيانات بعد يوم تقريباً. بس مش كل مرة رح تكون محظوظ.
- 5/ القواعد: نسخة احتياطية قبل أي شي · خلّيه يخطط وإنت بتوافق · أي أمر حذف اقراه بعينك.
4 · الإيميل
الموضوع: الأمر اللي مسح سنتين ونص من البيانات
أهلين 👋
هالأسبوع قصة حقيقية: مهندس خلّى Claude Code يرتّب السيرفرات، وبأمر حذف واحد راحت قاعدة البيانات كلها مع النسخ الاحتياطية. Claude كان نصحه ما يعملها.
رجعت البيانات بعد يوم… بس الدرس أهم: نسخة احتياطية قبل أي شي، خلّيه يخطط وإنت بتوافق، وأي أمر حذف اقراه بعينك.
ضياء
5 · الستوري (3 فريمات)
①
خسر سنتين ونص…
بأمر واحد 😨
②
Claude حذّره…
وهو كمّل
③
3 قواعد أمان 👇
(الريل الجديد)
لاحظ: ولا معلومة جديدة. نفس القصة ونفس القواعد الثلاثة، بس كل شكل إله إيقاعه. القصة كاملة والإعدادات بـ دليل إعدادات الأمان.
3
طول كل منشور وليش
| المنشور | الطول بالبرومت | ليش هيك |
|---|---|---|
| كاروسيل | 8 سلايدات · أقل من 12 كلمة بالسلايد | الناس بتسحب بسرعة؛ السلايد المليان بيوقّف السحب. سلايد 8 دايماً دعوة. |
| كابشن | أقل من 120 كلمة | أول 125 حرف هم اللي بيبينوا قبل «المزيد». الهوك بأول سطر، والدعوة بآخر سطر. |
| ثريد | 5 بوستات · جملة أو جملتين | البوست الأول بيقرّر إذا حدا بيفتح الباقي. الترقيم 1/ 2/ بيخلي القارئ يعرف إنه في تكملة. |
| إيميل | 100 لـ 150 كلمة | أطول من هيك ما بينقرأ على الموبايل. أسلوب رسالة لصاحب، مش نشرة. |
| ستوري | 3 فريمات · أقل من 8 كلمات بالفريم | الفريم بيضل 5 ثواني. الفريم الأخير بيوجّه للريل أو للكلمة. |
بدك النصوص تطلع أقرب لأسلوبك؟ ألصق معه مثالين من كتابتك وقوله «قلّد الإيقاع والمفردات». القواعد كاملة بـ دليل الكتابة مثل إنسان.
أسبوع من ريل واحد
الخمسة جاهزين. هلأ التوزيع.
4
وزّعهم على الأسبوع
- اليوم 1: الريل + الستوري الفريمات الثلاثة بنفس اليوم (الستوري بيجيب الناس للريل).
- اليوم 2: الثريد على Threads أو X. جمهور مختلف، ونفس الفكرة.
- اليوم 3: الكاروسيل بالكابشن الجديد. اللي فاته الريل بيشوف الفكرة بشكل بينقرأ.
- اليوم 5 أو 6: الإيميل للمشتركين، مع رابط الريل أو الدليل.
- بعد أسبوعين: أعد نشر الريل بهوك مختلف أو قصّة مختلفة. الفكرة اللي اشتغلت مرة بتشتغل مرتين.
- نفس الكلمة بكل مكان: «أمان» بالكاروسيل والكابشن والستوري، فالرد التلقائي بيشتغل على كل المنشورات بإعداد واحد.
- ما تنشر الخمسة بيوم واحد: الناس بتشوف نفس الفكرة 5 مرات وبتحس إنك بتكرّر. التوزيع هو اللي بيخلي كل واحد يبين جديد.
5
بـ Claude Code: ملفات وصور جاهزة
بتطبيق Claude بتاخد النصوص وبتنسخها. بـ Claude Code بتاخد الملفات جاهزة: ضيف هالسطور بآخر البرومت (قبل «النص:»):
احفظ كل منشور بملف لحاله بمجلد posts/ بالأسماء: carousel.md, caption.md, thread.md, email.md, story.md.
واعمل الكاروسيل صور PNG مقاس 1080×1350 بمجلد posts/carousel/ بهويتي حسب ملف brand.md.
الكاروسيل كصور بهويتك (ألوانك وخطك وصورك) إله دليل كامل: برومت الكاروسيل. ونص الريل نفسه، إذا عملته بالكود: برومت الريل.
بتعمل هاد كل أسبوع؟ احفظه كـ Skill: «احفظ طريقة التحويل هاي كـ Skill اسمها repurpose». بعدها كل ريل جديد = «repurpose هالنص». كيف: دليل أول Skill.
6
أخطاء بتخلي الخمسة يبينوا مكرّرين
نفس النص حرفياً بكل مكانالكابشن = الإيميل = الثريد. الناس بتلاحظ من أول سطر.
كل شكل إله إيقاعهالبرومت بيحدّد الطول والأسلوب لكل واحد. الفكرة وحدة، الكلام مختلف.
تخلّيه يضيف معلومات«حسّن المحتوى وضيف نصايح». صار ريل تاني، وبتنشر إشي ما قلته.
«بدون أي معلومة جديدة»نفس الفكرة بشكل تاني. التحسين بيصير بريل جديد مش بإعادة الاستخدام.
الخمسة بيوم واحدالجمهور بيشوف نفس القصة 5 مرات بنفس اليوم.
منشور باليومالقسم 4. كل واحد بيوصل لناس مختلفين بوقت مختلف.
كلمة مفتاحية مختلفة بكل منشور«أمان» بالريل و«حماية» بالكاروسيل. الرد التلقائي بيضيع.
كلمة وحدةمكتوبة بالبرومت بين الأقواس، وبتتكرر بالخمسة.
?
أسئلة شائعة
ما عندي نص للريل، بس الفيديو؟
ارفع الفيديو لتطبيق Claude واطلب «فرّغ الكلام اللي بالفيديو كنص» وبعدها الصق النص بالبرومت. أو استعمل الكابشن إذا كان فيه الفكرة كاملة.
بينفع لبوست مكتوب أو مقال بدل الريل؟
إيه، نفس البرومت. بدّل «نص ريل» بـ «مقال» والباقي زي ما هو. المقال الطويل بيطلّع كاروسيل أقوى لأنه فيه نقاط أكثر.
بدي 3 منشورات بس مش 5؟
احذف الأرقام اللي ما بدك ياها من البرومت. الكاروسيل والثريد والستوري هم الأسرع نشراً؛ الإيميل بيحتاج قائمة مشتركين.
لهجتي مش أردنية؟
بدّل «[الأردنية الخفيفة]» بلهجتك: «المصرية»، «السعودية»، «الخليجية»، أو «العربية الفصحى المبسّطة». وألصق مثال من كتابتك عشان يمسك الإيقاع.
قديش بيكلّف؟
البرومت والنتيجة أقل من صفحة نص؛ بتعمله على الخطة المجانية لتطبيق Claude بدون مشكلة. نسخة Claude Code مع الصور بدها اشتراك مدفوع.