شو بيعمل النظام كل يوم (بالأرقام)
والرابعة: تحليل كل ريل بعد 24 و72 ساعة (مشاهدات، حفظ، مشاركات، تعليقات) مقارنة بوسيط حسابي، مع تشخيص قصير بـ Claude: «الهوك ضعيف» أو «الحفظ عالي، كرّر الفكرة». هاد اللي كان موظف بيعمله بنص يوم، صار بيصير لحاله وأنا براجع وبقرّر.
الأثر الحقيقي مش التوفير بالراتب؛ هو إنه كل ريل صار إله هدية ورد بدون ما أنسى، وكل تعليق بالكلمة بيوصله الرابط وأنا نايم. هاد اللي بيبني القائمة والثقة.
مش تطبيق تنزّله: شو بتبني وشو بتشتري
وبصراحة، في بديل أسرع لكل قطعة لو ما بدك تبني: أدوات رد آلي جاهزة (مدفوعة شهرياً) وأدوات جدولة جاهزة. الفرق: الجاهز بيعمل الشي الشائع بشكله، والمبني بيعمل شغلك بشكلك (الرسالة، الهدية، التحليل) والكود عندك. لو بتنشر ريل بالأسبوع، الجاهز أرخص. لو بتنشر كل يوم ولك هدية بكل ريل، البناء بيستاهل.
شو بتحتاج
- حساب إنستغرام احترافي + صفحة فيسبوك مربوطين، وتطبيق مطوّر على Meta (developers.facebook.com/docs/instagram-platform): منه بتاخد الصلاحيات والمفاتيح.
- Claude Code على خطة مدفوعة (التركيب). هو اللي بيكتب كل الكود.
- سيرفر صغير على الإنترنت (VPS بـ 5$ بالشهر بيكفي) لأن Meta بتبعت التعليقات لرابط عام (webhook)، والنشر المجدول بده شي شغّال 24 ساعة.
- قاعدة بيانات بسيطة (SQLite بتكفي بالبداية، أو Mongo/Postgres): البوستات، الردود، الإحصائيات.
- صبر على مراجعة التطبيق: بعض صلاحيات Meta وتيك توك ويوتيوب بتشتغل على حسابك إنت بدون مراجعة، والنشر العام الكامل بده مراجعة. التفاصيل بالقسم 6.
الرد الآلي أول، بعدين الجدولة، بعدين الكابشن، وآخر شي التحليل.
الرد الآلي بالهدية (أكبر أثر بأقل كود)
ابدأ هون لأنه قطعة وحدة بتغيّر كل شي: من اليوم كل ريل بتنزّله إله هدية بتوصل لحالها. الآلية:
- Meta بتبعت لسيرفرك إشعار (webhook) بكل تعليق جديد على ريلاتك.
- سيرفرك بيفحص: هل الريل إله «إعداد» (رسالة هدية)؟ هل التعليق فيه الكلمة (أو كل تعليق)؟
- سيرفرك بيبعت رد خاص على التعليق (private reply) فيه الرابط، وبيرد على التعليق علناً بكلمة قصيرة («وصلك؟»).
- سيرفرك بيسجّل: مين، إمتى، نجح ولا فشل، وليش.
| المكوّن | شو هو |
|---|---|
| صلاحيات Meta | إنستغرام: قراءة الحساب، إدارة التعليقات، إدارة الرسائل. فيسبوك: الصفحات والتعليقات والرسائل. الأسماء الدقيقة بتتغيّر؛ اطلب من Claude Code يقرأ صفحة الصلاحيات الحالية. |
| webhook | رابط https على سيرفرك بيستقبل أحداث comments (وmessages لو بدك كلمات بالدايركت)، مع التحقق من التوقيع. |
| جدول الإعدادات | لكل ريل: رابط/معرّف الريل، نص الهدية، كلمات التشغيل (أو «كل تعليق»)، شرط المتابعة، مفعّل/موقوف. |
| طابور | الردود بتدخل طابور وبتتبعت بالتدريج مع إعادة محاولة؛ Meta بترفض لو بعتت كثير دفعة وحدة. |
| backfill | لما تضيف إعداد لريل نازل من قبل، النظام بيرد على اللي علّقوا قبل (بس اللي تعليقهم أحدث من 7 أيام، حد Meta). |
نص الهدية اللي بشتغل فيه (بدّل الوعد والرابط):
أهلين! وصلتني 🙌 هاي هديتك زي ما وعدتك: [شو بالضبط، بكلمات الكابشن]:
🔗 https://موقعك/الدليل
أي سؤال أنا موجود 🤍قرارين مهمّين من التجربة: (1) الرد لكل من يعلّق مش بس للي كتب الكلمة بالضبط: الناس بتغلط بالإملاء، والهدية هي الهدف. (2) شرط المتابعة اختياري ومهذّب: «فضلاً وليس أمراً، تابعني وبعدها اكبس الزر وبوصلك الرابط». رفع نسبة المتابعة بدون ما يزعّل حدا.
الجدولة والنشر من داشبورد واحد
القطعة الثانية: جدول posts (الفيديو، الغلاف، الكابشن لكل منصة، الوقت، الحالة) + worker بيفحص كل 15 ثانية شو صار وقته وبينشره. القاعدة الذهبية عندي: الموافقة يدوية دايماً. الأتمتة بتحضّر، أنا بكبس «موافق» أو «جدول».
| المنصة | كيف بينشر | اللي لازم تعرفه |
|---|---|---|
| إنستغرام | Graph API: رفع الريل كـ container ثم نشره؛ غلاف، موقع، وخيار Trial (ريل تجريبي ما بيظهر على البروفايل). | الفيديو لازم يكون على رابط عام (S3 أو سيرفرك) عشان Meta تسحبه. |
| فيسبوك | Pages API: ريل على الصفحة. | حساب واحد لكل صفحة؛ الصلاحيات بتختلف عن إنستغرام. |
| Threads | Threads API: منشور فيديو. | تطبيق Meta منفصل بمفاتيحه، والغلاف بينتجاهل. |
| تيك توك | Content Posting API: بدون مراجعة = مسوّدة بتوصل لإنبوكس التطبيق وبتنشرها بإيدك. | النشر المباشر العام بده مراجعة تطبيق، وبدونها بيكون «خاص» بس. |
| يوتيوب | Data API: رفع Short بعنوان ووصف ووسوم. | بدون مراجعة Google الفيديو بيبقى «خاص»؛ وشاشة الموافقة لازم تكون In production وإلا المفاتيح بتنتهي كل 7 أيام. |
الداشبورد نفسه صفحة ويب بسيطة: قائمة بوستات بحالاتها (مسوّدة، مجدول، نُشر، فشل)، زر موافقة، وقت، وصندوق إنبوكس للي بده قرار. Claude Code بيبنيه لك بـ Next.js أو أي شي، والمهم إنه يستعمل نفس قاعدة البيانات. دليل الموقع بـ Claude Code لو هاي أول صفحة ويب تبنيها معه.
الكابشن لكل منصة من ملف واحد
كل ريل عندي إله ملف نصي واحد: الهوك، الكابشن الأساسي (إنستغرام)، نسخة فيسبوك، نسخة Threads (أقصر، بدون وعد دايركت لأنه ما في دايركت)، عنوان ووصف يوتيوب، ووسوم. أداة النشر بتقرأه وبتفحص حدود كل منصة قبل ما تبعت (طول الكابشن، عدد الهاشتاقات، طول العنوان).
القواعد اللي بيمشي عليها Claude لما يكتب النسخ (حطها بملف SKILL.md أو بالبرومبت):
- أول سطر = هوك ثاني (أول 125 حرف هم اللي بيبينوا قبل «المزيد»).
- 3 إلى 5 هاشتاقات بس، كلها ذات صلة، جوّا الكابشن. بدون fyp وviral.
- نفس الكلمات المفتاحية اللي على الشاشة بتنكتب بالكابشن.
- إنستغرام وفيسبوك: السطر الأخير = «اكتب «الكلمة» بالتعليقات وببعتلك…».
- على Threads: بدون وعد دايركت (ما فيه رسائل)؛ «اكتب الكلمة بالرد وبحطلك الرابط».
- تيك توك ويوتيوب: بدون وعد دايركت، والهدية على إنستغرام.
- يوتيوب: عنوان أقل من 100 حرف، الوسوم من الهاشتاقات.
- التعليق الأول = سؤال بيحرّك الردود (بينكتب يدوياً بعد النشر).بعد الكابشن الأساسي، بتقدر تطلّع من نفس الريل بوستات ثانية: دليل خمس بوستات من ريل واحد.
تحليل كل ريل بعد النزول
آخر قطعة، وأقلّها كود: مهمة دورية بتسحب إحصائيات كل ريل بعد 24 و72 ساعة (مشاهدات، وصول، حفظ، مشاركات، تعليقات) وبتخزّنها. بعدين بتحسب وسيط حسابك لكل مقياس على آخر 30 ريل، وبتعطي كل ريل علامة مقارنة بالوسيط. وآخر خطوة سطرين من Claude:
هاي أرقام ريل نزل قبل 72 ساعة مقارنة بوسيط الحساب: مشاهدات 1.4×، حفظ 2.1×، مشاركات 0.6×، تعليقات 1.9×، الهوك: «…». بسطرين: شو اشتغل وشو ما اشتغل، وشو أعمل بالريل الجاي. بدون مجاملات.الحفظ العالي = فكرة بتستاهل تتكرّر بزاوية ثانية. المشاركات المنخفضة مع مشاهدات عالية = الهوك حلو بس الناس ما لقت شي تبعته لصاحبها. هاي القراءات صارت عندي قاعدة بدل الإحساس. طريقة بديلة بدون نظام: دليل تحليل الريلز بـ Claude.
البرومبتات الجاهزة لـ Claude Code
1) الخطة قبل الكود (بمجلد فاضي، أول محادثة):
بدي أبني نظام سوشال ميديا لحسابي بأربع قطع، بالترتيب: (1) رد آلي على تعليقات إنستغرام وفيسبوك بالكلمة المفتاحية يبعت رسالة خاصة بالرابط، (2) جدولة ونشر ريلز على إنستغرام وفيسبوك وThreads ويوتيوب وتيك توك من داشبورد بموافقة يدوية، (3) كتابة كابشن لكل منصة من ملف واحد، (4) تحليل إحصائيات كل ريل بعد 24 و72 ساعة.
قبل أي كود: اقرأ وثائق Meta الحالية للصلاحيات المطلوبة، واكتب لي ملف PLAN.md فيه: المكوّنات، قاعدة البيانات (SQLite بالبداية)، الصلاحيات اللي بدها مراجعة وإللي لا، وخطة من 4 مراحل كل مرحلة بتشتغل لحالها. لا تبدأ بالكود قبل ما أوافق على الخطة.2) المرحلة الأولى (الرد الآلي):
نفّذ المرحلة 1 من PLAN.md: سيرفر Node صغير فيه (أ) webhook لـ Meta مع التحقق من التوقيع وتسجيل كل حدث تعليق، (ب) جدول إعدادات لكل ريل (معرّف الريل، نص الرسالة، كلمات التشغيل أو «الكل»، مفعّل)، (ج) طابور ردود بإعادة محاولة، (د) أمر backfill للتعليقات الأحدث من 7 أيام. المفاتيح من متغيّرات البيئة. اكتب اختبارات للـ webhook قبل الكود، وبالآخر اعطيني قائمة الخطوات اللي لازم أعملها أنا بلوحة Meta (الرابط، الصلاحيات، التوكن).3) المرحلة الثانية (الجدولة):
نفّذ المرحلة 2: جدول posts (فيديو، غلاف، كابشن لكل منصة، وقت، حالة، أهداف لكل منصة بحالتها)، worker كل 15 ثانية بينشر اللي صار وقته، وإعادة محاولة ما بتنشر مرتين (خزّن معرّف الرفع). ابدأ بإنستغرام بس، وبعد ما يشتغل ضيف فيسبوك. صفحة داشبورد بسيطة: قائمة، موافقة، وقت. بدون نشر تلقائي بدون موافقة.طريقة الشغل اللي وفّرت عليّ أكثر شي: اختبارات قبل الكود، ومرحلة وحدة شغّالة قبل اللي بعدها.
الحدود، الأخطاء، والصدق.
حدود Meta والمنصات اللي تعلّمتها بالغلط
- الرد الخاص على تعليق بس خلال 7 أيام من التعليق. اللي أقدم بينرفض. يعني الإعداد لازم يكون جاهز يوم النزول، أو خلال الأسبوع.
- التوكنات بتنتهي (حوالي 60 يوم لتوكنات Meta الطويلة): اعمل تنبيه قبل بأسبوع وطريقة تجديد بكبسة.
- كلمة الدايركت خطيرة: لو عملت كلمة «بالخاص» عامة («رابط»، «تم») رح تجاوب عملاءك الحقيقيين بالغلط. كلمة بالتعليقات آمنة؛ كلمة بالدايركت لازم تكون نادرة.
- الفيديو لازم يكون على رابط عام عشان إنستغرام تسحبه: تخزين سحابي خاص برابط مؤقّت موقّع، مش رابط دائم مكشوف.
- تيك توك ويوتيوب بدون مراجعة = خاص/مسوّدة. تيك توك بترفض النشر العام من تطبيق غير مراجع، وقواعدهم بتقول التطبيق لازم ما يكون للاستخدام الشخصي؛ أنا خلّيتها «مسوّدة للإنبوكس» وبنشر من التطبيق بكبسة. يوتيوب بيخلّي الفيديو خاص لحد ما يراجعوا مشروعك.
- Threads ما فيها دايركت: البوت بيرد علناً تحت التعليق بالرابط. غيّر الوعد بالكابشن.
- ريل واحد مرتين بنفس اليوم على إنستغرام ممكن ينحسب مكرّر؛ استعمل Trial (ريل تجريبي) للنسخة الثانية بهوك مختلف.
أخطاء بتضيّع أسابيع
| الغلط | شو بيصير | الصح |
|---|---|---|
| تبدأ بالداشبورد الحلو | أسبوعين واجهة وولا رد وصل لحدا. | الرد الآلي أول (يوم)، الداشبورد آخر شي. |
| تطلب من Claude Code «ابنِ لي النظام كامل» | كود كثير ما بيشتغل مع بعض. | خطة، بعدين مرحلة مرحلة، كل وحدة بتشتغل لحالها. |
| مفاتيح بالكود | تسريب مع أول رفع على GitHub. | متغيّرات بيئة على السيرفر. |
| نشر تلقائي بدون موافقة | ريل غلط بوقت غلط وما بتقدر ترجّعه. | موافقة يدوية على كل بوست. |
| إعادة محاولة بدون حفظ معرّف الرفع | نفس الريل بينزل مرتين. | خزّن معرّف الجلسة وكمّل منها. |
| تنسى حد الـ 7 أيام | ريل نزل وما إله رد لأسبوعين = هدايا ضايعة. | روتين بعد كل نشر: الهدية + الإعداد بنفس اليوم. |
تنبيهات صدق
- «بدّلت موظف» = بدّلت الشغل المتكرّر. الفكرة والسكربت والقرار لسا مني، وأنا براجع كل بوست قبل ما ينزل. الموظف اللي بيفكّر معك ما بينبدّل.
- الأرقام حقيقية من نظامي: 2,553 رسالة و50 فشل لغاية 2026-10-31، وبتزيد كل يوم. «آلاف الرسائل» بالريل = هاد الرقم.
- البناء أخذ أسابيع مش يوم، لأنه كل منصة إلها مزاجها وطلبات المراجعة. أول قطعة (الرد الآلي) فعلاً يوم.
- التكلفة: سيرفر صغير + تخزين + اشتراك Claude (Pro أو Max لـ Claude Code). الـ APIs نفسها مجانية.
- مش منتج: ما ببيع هالنظام وما في «نسخة». الدليل خريطة، والبناء بأيدك مع Claude Code.
- الفكرة من ريل noevarner.ai؛ النظام والأرقام والشاشات اللي بالريل من عندي.