الهارد امتلى عالآخر: البرومت اللي بيلاقي شو مالي جهازك… بأمان — ضياء البوزان

شو صار بالليل بالضبط؟

كان Claude Code عم يرندر ريلز وكاروسيلات طول الليل. كل تصدير بيترك وراه مجلدات مؤقتة، وما حدا نضّفها. الساعة 5 الفجر وقف كل إشي:

القرص

0.26 GB فاضية من أصل 454 GB على C:

الخطأ

ENOSPC: no space left on device ووقف الرندر بنص الشغل

اللي لقاه

7 مجلدات remotion-webpack-bundle بالـ Temp، حوالي 70 مجلد _bundle، ومئات مجلدات assets من تصديرات قديمة

النتيجة

32 GB رجعت فاضية، والرندر كمّل لـ 100%

Claude شاف الخطأ وفهم إنه مشكلة مساحة مش مشكلة كود.
Claude قاس المجلدات الكبيرة بالـ Temp ومجلد الرندر، وطلّع قائمة بأحجامها.
Claude تأكد إنه ما في رندر شغّال هلأ بيستعمل هالملفات (المجلدات المؤقتة إلها تاريخ قديم ومش مفتوحة من أي برنامج).
Claude حذف المؤقتة بس، وما قرّب على ملفات المشروع ولا الفيديوهات النهائية.
أنا الصبح قرأت التقرير: شو انحذف، قديش رجع، وليش. وهاد بالضبط اللي بدي ياه يصير معك… بس مع موافقتك قبل الحذف.

ليش حذف بدون ما يسألني؟ لأنه كان شغّال بالليل بوضع مسموح فيه ينفّذ لحاله، وبقواعد مكتوبة من قبل: المؤقتة بس، ولا يلمس المشروع. إنت بالبرومت تحت بتخليه يسأل قبل كل حذف. هيك أأمن لأول مرة.

3 دقايق

البرومت مكتوب بالعربي، وبيشتغل على Windows وMac وLinux. Claude بيعرف أوامر كل نظام لحاله.

القاعدة الذهبية: هو بيلاقي، إنت بتقرر

الطلب الخطر«نضّف الجهاز» أو «احذف الملفات اللي ما بحتاجها». هيك عطيته الحكم، وهو ما بيعرف شو مهم عندك.

الطلب الآمن«اعرضلي شو مالي المساحة، واحكم على كل مجلد، ولا تحذف إشي قبل موافقتي». القرار بيرجعلك إنت.

بيقيس

أكبر المجلدات بأحجامها، مش تخمين.

بيشرح

شو هاد المجلد، وأي برنامج عمله.

بيحكم

آمن ينحذف / مش متأكد / لا تلمسه.

وبعدها إنت بتختار من القائمة، وهو بينفّذ. ولا ملف بينحذف قبل ما تشوفه بعينك.

البرومت: انسخه والصقه

افتح الطرفية بمجلد المستخدم تبعك (على Windows اكتب cd %USERPROFILE%، وعلى Mac أو Linux cd ~)، شغّل claude، والصق:

جهازي مليان. بدي أعرف شو مالي المساحة، بدون ما تحذف ولا تنقل ولا ملف قبل ما أوافق.

1. اعرضلي المساحة الفاضية والمستعملة لكل قرص.
2. طلّعلي أكبر 20 مجلد بمجلد المستخدم وبمجلد الملفات المؤقتة (Temp)، مع حجم كل واحد، مرتّبين من الأكبر للأصغر.
3. لكل مجلد: شو هو بكلمتين، أي برنامج عمله، ومتى آخر مرة انعدّل، وحكمك: آمن ينحذف / مش متأكد / لا تلمسه.
4. لا تقترب من مجلدات النظام (Windows، Program Files، System) ولا من ملفاتي الشخصية (الصور، المستندات، سطح المكتب، الفيديوهات).
5. قبل أي حذف: تأكد إنه ما في برنامج شغّال هلأ بيستعمل هالملفات، واعرضلي القائمة النهائية والحجم اللي رح يرجع، واستنى موافقتي على كل بند.
6. بعد موافقتي: انقل للسلة (Recycle Bin / Trash) إذا بتقدر بدل الحذف النهائي، وبالآخر اعرضلي قديش رجع فاضي.

«قبل ما أوافق»: أهم جملة. بدونها ممكن يبلّش يحذف من أول مجلد بيشوفه «مؤقت».
«متى آخر مرة انعدّل»: المجلد المؤقت اللي عمره شهور آمن أكثر من واحد انعدّل قبل 5 دقايق.
«انقل للسلة»: لو طلع إشي مهم، بترجّعه بكبسة. الحذف النهائي ما بيرجع.
بدك قرص تاني؟ ضيف سطر: «افحص كمان القرص D:» أو أي مسار بدك ياه.

رح يطلب إذنك على كل أمر: هاد طبيعي ومطلوب هون. اقرأ الأمر قبل ما توافق. أوامر القياس (زي du أو Get-ChildItem) آمنة؛ أي أمر فيه حذف (rm، Remove-Item، del) وقّف عنده وشوف شو المسار. ما تبدّل لوضع القبول التلقائي بهالمهمة.

كيف تقرأ القائمة اللي بيطلّعها

بيرجعلك جدول شبه هاد. ركّز على عمود الحكم، وعلى تاريخ آخر تعديل:

الحكم	يعني	شو تعمل
آمن ينحذف	ملفات مؤقتة أو كاش بيرجع البرنامج يعملها لحاله لما يحتاجها	وافق، بس بعد ما تتأكد إنه البرنامج اللي عملها مش شغّال هلأ
مش متأكد	مجلد كبير بس ما بيعرف إذا بتحتاجه: مشروع قديم، تنزيلات، نسخ احتياطية	افتحه إنت وشوف. أو اطلب منه: «افتح لي أكبر 5 ملفات جوّاه واحكيلي شو هم»
لا تلمسه	نظام، برامج مثبّتة، أو ملفاتك الشخصية	ولا تفكر. حتى لو كبير

بعد ما تقرّر، اكتبله بالعربي زي ما بتحكي: «احذف البند 1 و3 و4 بس، والباقي خلّيه». بينفّذ وبيعرضلك قديش رجع.

عشان ما تتكرر

90% من الحالات نفس الأماكن الخمسة.

أشهر الأماكن اللي بتاكل المساحة

المكان	ليش بيكبر	آمن؟
مجلد Temp %LOCALAPPDATA%\Temp على Windows · /tmp و~/Library/Caches على Mac	برامج بتعمل ملفات مؤقتة وبتنسى تنضّف وراها. هيك صار معي: كل تصدير فيديو ترك 3 GB	آمن، بس لما تكون البرامج مسكّرة
التنزيلات (Downloads)	ملفات تثبيت قديمة، أرشيفات فكّيتها ونسيتها، فيديوهات	افتحه إنت: فيه إشي إلك
node_modules بمشاريع قديمة	كل مشروع ويب بيحمّل مئات الميغا من الحزم. مشروع ما فتحته من شهور = مساحة ميتة	آمن: الأمر npm install بيرجّعه لما تحتاجه
تصدير ورندر الفيديو	مجلدات out وrender ونسخ قديمة من نفس الفيديو	خلّي النسخة النهائية واحذف التجارب
كاش البرامج	npm، pip، المتصفحات، أدوات التصميم، نماذج الذكاء الاصطناعي المحلية	آمن، بيرجع يتعبّى لحاله مع الوقت

بدك يفحص هالأماكن بالتحديد؟ ضيف للبرومت: «وافحص كمان: مجلد التنزيلات، وكل مجلد node_modules ما انعدّل من 3 شهور، وكاش npm وpip».

إذا امتلى الهارد وهو بنص الشغل

نفس اللي صار معي: Claude شغّال على مهمة طويلة، وفجأة بيطلع ENOSPC أو There is not enough space on the disk. ما تسكّر الجلسة. اكتبله:

الهارد امتلى. وقّف المهمة الحالية، ولا تحذف أي ملف من المشروع أو من النتائج اللي خلّصتها.
دوّر على الملفات المؤقتة اللي عملتها هالجلسة (ومجلد Temp عموماً)، تأكد إنه ما في عملية شغّالة عليها، واعرضلي القائمة وحجمها قبل ما تحذف.
بعد موافقتي نضّفها، وبعدين كمّل المهمة من وين وقفت.

«ولا تحذف من النتائج»: أول إشي بيخطر على باله يحذف ملفات التصدير الكبيرة، وهي بالضبط اللي تعبت عليها.
«كمّل من وين وقفت»: أغلب الأدوات بتقدر تكمّل، وما بدك تعيد الشغل من الصفر.
بتشتغل بالليل لحالك؟ اكتب قاعدة بملف CLAUDE.md تبع المشروع: «إذا امتلى القرص، نضّف ملفاتك المؤقتة بس وكمّل، ولا تلمس غيرها». هيك اشتغل عندي. القالب كامل بـ دليل CLAUDE.md.

أخطاء بتخرب الجهاز

«نضّف الجهاز» وبسعطيته الحكم على ملفاتك. ممكن يشوف مجلد مشروع قديم «ما انعدّل من زمان» ويعتبره مؤقت.

«اعرضلي القائمة بالأول»هو بيقيس وبيحكم، وإنت بتختار. القرار بأيدك دايماً.

تحذف ملفات برنامج شغّالالمتصفح مفتوح وبتحذف كاشه، أو الرندر شغّال وبتحذف مؤقتاته. بيخرب الشغل اللي عم يصير هلأ.

سكّر البرامج قبلوخلّيه يتأكد إنه ما في عملية شغّالة على المجلد قبل الحذف (هاد موجود بالبرومت).

تقرّب على مجلدات النظامWindows، Program Files، System. مجلد WinSxS مثلاً بيبين عشرات الجيجا وما بينحذف أبداً بإيدك.

النظام إله أدواتهعلى Windows استعمل «تنظيف القرص» (Disk Cleanup) أو إعدادات التخزين لملفات النظام، وخلّي Claude لملفاتك إنت.

وضع القبول التلقائي بهالمهمةبتضغط Shift+Tab عشان يخلّص بسرعة، فبينفّذ أوامر الحذف بدون ما تشوفها.

خلّيه يسأل على كل أمرالتنظيف مهمة بتستاهل 3 دقايق قراءة. قواعد الأمان الكاملة بـ دليل إعدادات الأمان.

أسئلة شائعة

لازم أكون مبرمج عشان أستعمل البرومت؟

لا. البرومت بالعربي، والقائمة اللي بترجعلك بالعربي. كل اللي بدك ياه تثبّت Claude Code مرة وحدة (دليل التثبيت) وتعرف تفتح الطرفية.

بيشتغل على Mac وLinux؟

إيه، نفس البرومت. Claude بيعرف إنه الـ Temp على Mac بـ /tmp و~/Library/Caches، وبيستعمل أوامر النظام الصح لحاله.

ليش ما أستعمل برنامج تنظيف عادي؟

برامج التنظيف بتحذف حسب قوائم جاهزة. Claude بيقرأ وضعك إنت: بيشوف إنه مجلد الرندر تبعك هو السبب، وبيشرحلك ليش، وبيتأكد إنه مش مستعمل هلأ. وبتسأله «شو هاد؟» على أي مجلد وبيجاوبك.

حذف إشي كان لازمني. شو أعمل؟

إذا طلبت «انقل للسلة» زي ما بالبرومت، رجّعه من سلة المحذوفات. وإذا كان كاش أو node_modules، البرنامج بيرجع يعمله لحاله (مثلاً npm install). عشان هيك خلّي خطوة السلة بالبرومت دايماً.

قديش بياخد وقت؟

القياس دقيقة لدقيقتين حسب حجم القرص. عندي لقى الـ 32 GB وقاسها قبل ما أخلّص قهوتي. الحذف نفسه ثواني.