10+ free AI coding tools from Google: the full list with links — Diyaa Albouzan

الـ 11 أداة بجدول واحد

#	الأداة	شو بتعمل	الرابط
1	Antigravity (التطبيق + IDE)	منصة وكلاء من Google: تطبيق سطح مكتب بوكلاء متوازيين، وIDE كامل زي Cursor. خطة مجانية دائمة	antigravity.google
2	Antigravity CLI (agy)	نفس الوكيل بالطرفية (حلّ مكان Gemini CLI للأفراد)	antigravity.google/docs
3	إضافات Antigravity لـ VS Code وJetBrains	إكمال وشات ووكيل جوّا محرّرك الحالي (حلّت مكان Code Assist للأفراد)	antigravity.google/docs/ide/extensions
4	AI Studio + وضع Build	تجربة Gemini، مفتاح API مجاني، وتطبيق كامل من وصف (حتى تطبيقات أندرويد) مع نشر مجاني لأول تطبيقين	aistudio.google.com
5	Stitch	وصف أو رسمة أو صوت → تصميم واجهة + ملف Figma + كود HTML/CSS	stitch.withgoogle.com
6	Jules	وكيل بيتوصل بـ GitHub: بيضيف ميزات، بيصلّح أخطاء، بيفتح Pull Request. 15 مهمة باليوم ببلاش	jules.google
7	Gemini Canvas	جوّا تطبيق Gemini: فكرة → تطبيق ويب أو لعبة صغيرة بتجرّبها وبتشاركها	gemini.google.com
8	Colab	دفاتر Python مجانية، وGemini بيكتب الخلايا وبيصلّح الأخطاء	colab.research.google.com
9	وكيل Android Studio	الوكيل المدمج بـ Android Studio لتطبيقات أندرويد، بدون اشتراك	developer.android.com/gemini-in-android
10	Skills في Gemini	أوامر /اسم بتحفظ فيها طريقة شغل وبتعيد استعمالها: خليفة Opal وGems	blog.google (Skills)
11	Opal	تطبيقات AI صغيرة بدون كود. بتتوقف 17 نوفمبر 2026 وبتنتقل لـ Skills	opal.google

«مجانية» يعني: لكل أداة خطة مجانية بحساب Google (فحصت الصفحات الرسمية يوم 2026-11-01). كلها بحدود يومية أو أسبوعية وإلها باقات مدفوعة أعلى (Google AI Pro وUltra). القسم 9 فيه الأرقام. وبعض الأدوات بتطلب عمر 18+ وحساب شخصي مش حساب شركة.

بدك تبني

Antigravity (تطبيق، IDE، CLI، أو إضافة لمحرّرك): وكيل بيكتب الكود كامل.

بدك تجرّب فكرة

AI Studio Build وGemini Canvas: نموذج أولي بدقايق بدون تثبيت.

بدك تصميم أو صيانة

Stitch للواجهة، وJules يشتغل على مستودعك وإنت نايم.

شو بتعمل ولمين

كل أداة: شو بتعمل، لمين، وأول خطوة بدقيقة.

Antigravity: منصة الوكلاء (تطبيق + IDE)

شو هو: بلّش بنوفمبر 2025 كمحرّر كود بوكلاء زي Cursor، وصار منصة كاملة: تطبيق سطح مكتب بتشغّل فيه كذا وكيل بنفس الوقت، IDE كامل، CLI بالطرفية (agy)، وإضافات لـ VS Code وJetBrains. بتكتب شو بدك بجملة، بيخطّط، بيكتب الكود بملفات مشروعك، وبيشغّل المعاينة.

لمين: اللي بيدفع اشتراك Cursor أو Windsurf وبده بديل مجاني، أو اللي بده يبلّش مشروع كامل من الصفر.

افتح antigravity.google، نزّل التطبيق أو الـ IDE، وسجّل دخول بحساب Google (الخطة Free بدون بطاقة).
افتح مجلد فاضي، واكتب للوكيل: «اعمل لي صفحة هبوط لخدمة تصميم مواقع، بالعربي، مع نموذج تواصل».
راجع الخطة اللي بيعرضها قبل ما يكتب، وبعدها افتح المعاينة وعدّل بالكلام.

المجاني: خطة Free للأفراد (0$) بأكثر من موديل وكيل، إكمال Tab بلا حدود، و«حدود أسبوعية أساسية» على الوكلاء. Google AI Pro وUltra بيرفعوا الحدود. موديل Gemini 4 Argon للمدفوع بس.

AI Studio: نموذج أولي أو تطبيق كامل بثواني

شو هو: واجهة Google لبناء أشياء بـ Gemini من المتصفح: شات مع الموديل، مفتاح API مجاني، ووضع Build اللي بيطلّع لك تطبيق ويب شغّال من وصف نصّي (وصار يطلّع تطبيقات أندرويد كمان، وبيصدّر المشروع لـ Antigravity لما تكبر).

لمين: اللي بده يجرّب فكرة على Gemini قبل ما يبرمج أي شي، أو بده مفتاح API مجاني يبلّش فيه.

افتح aistudio.google.com بحساب Google (الأردن ودول الخليج والشام كلها بقائمة الدول المتاحة، ما عدا سوريا).
جرّب الشات أول، وبعدها Build: «تطبيق بيستلم صورة فاتورة وبيطلّع جدول المصاريف».
من «Get API key» خذ مفتاح لو بدك تربط Gemini بسكربت أو بموقعك.

المجاني: AI Studio نفسه ببلاش بكل الدول المتاحة، ومفتاح API بمستوى مجاني (موديلات Flash وغيرها بحدود طلبات بالدقيقة واليوم)، ونشر أول تطبيقين من Build على Google Cloud ببلاش بدون بطاقة.

Stitch: وصف أو رسمة → واجهة + كود

شو هو: أداة تصميم بالـ AI من Google Labs: بتوصف الشاشة بجملة (أو بصوتك)، أو بترفع رسمة بإيدك، وبتطلّع لك تصميم واجهة موبايل أو ويب بدقة عالية مع ملف Figma قابل للتعديل وكود HTML/CSS. بتعدّل بالكلام، وبتصدّر الشاشات لـ Antigravity أو بتنشرها كصفحة ويب.

لمين: اللي بيبني تطبيق وما عنده مصمّم، أو اللي بده يفرجي العميل شكل الشاشات قبل ما يبرمج.

افتح stitch.withgoogle.com.
اكتب: «شاشة تسجيل دخول لتطبيق توصيل طعام، عربي، ألوان دافية، زر واحد كبير».
اطلب تعديلات بالكلام، وبعدها انسخ الكود أو صدّر لـ Figma.

المجاني: مجاني لكل المستخدمين عالمياً، برصيد يومي من التوليدات بيتجدّد كل يوم (Google ما بتنشر الرقم بصفحة رسمية، فلا تبني عليه حصة محددة).

Opal: بدون كود… لغاية 17 نوفمبر

تحديث بعد الريل: صفحة Opal نفسها بتقول إنها «بتتخرّج من Labs» يوم 17 نوفمبر 2026: التطبيقات اللي بنيتها بتوقف تشتغل بعد هالتاريخ، وملفاتها بتضل بـ Drive تحت My Drive ← Opal. البديل الرسمي: Skills في Gemini (القسم 6).

شو هي: من Google Labs: بتوصف «تطبيق AI صغير» بالكلام (مثلاً: بياخد موضوع، بيكتب 5 أفكار ريلز، وبيطلّع صورة غلاف لكل وحدة)، وبتبني لك سلسلة خطوات بتربط نماذج Google ببعض وبتشاركها برابط. بالإنجليزي بس، وبحساب Google شخصي، و18+.

شو تعمل هلأ: لو عندك تطبيقات عليها، صدّر فكرتها لـ Skill بـ Gemini قبل 17 نوفمبر. ولو لسا ما جرّبتها، ابدأ مباشرة بـ Skills أو بـ AI Studio Build، أوفر لوقتك.

Jules: وكيل بيشتغل على GitHub

شو هو: وكيل برمجة «غير متزامن»: بتوصّله بمستودعك على GitHub (أو بتحط وسم jules على Issue)، بتعطيه مهمة (ضيف ميزة، صلّح خطأ، حدّث المكتبات)، وبيشتغل لحاله على نسخة من مشروعك بجهاز سحابي، بيفرجيك الفرق، وبيفتح Pull Request تراجعه وتدمجه.

لمين: اللي عنده مشروع قائم ومهام صغيرة متراكمة. الفرق عن المحرّر: ما بتقعد تراقبه؛ بتعطيه المهمة وبتروح.

افتح jules.google، اربط حساب GitHub، واختار المستودع والفرع.
اكتب مهمة واضحة ومحدودة: «ضيف اختبارات لدالة حساب الضريبة بملف tax.ts».
راجع الخطة، وبعدها الـ PR اللي بيفتحه. ادمج بس بعد ما تقرأ التغييرات.

المجاني: الخطة الأساسية بدون تكلفة: 15 مهمة باليوم (نافذة 24 ساعة) و3 مهام بنفس الوقت. Google AI Pro: 100 باليوم و15 متوازية، وUltra: 300 و60. عمر 18+، والخطط المدفوعة لحسابات Gmail الشخصية.

حتى تكمّل الـ 10+

ستة أدوات كمان، وبعدها اللي خلص عشان ما تدوّر عليه.

الستة الباقية

Antigravity CLI (antigravity.google/docs): نفس الوكيل بالطرفية، الأمر agy. بيقرأ مشروعك، بيعدّل الملفات، وبيشغّل الأوامر؛ نفس منطق Claude Code. مجاني بخطة Free بحدود أسبوعية. هو اللي حلّ مكان Gemini CLI للأفراد من 18 يونيو 2026.
إضافات Antigravity لـ VS Code وJetBrains (antigravity.google/docs/ide/extensions): لو ما بدك تغيّر محرّرك: إكمال كود، شات، ووكيل جوّا VS Code (من الـ Marketplace) أو JetBrains (من JetBrains AI ← Agents)، وكمان Visual Studio وZed وXcode. بأي خطة Antigravity ومنها Free. حلّت مكان Code Assist للأفراد.
Gemini Canvas (gemini.google.com): جوّا تطبيق Gemini نفسه: اكتب الفكرة، اختار Canvas، وبيكتب الكود وبيحوّلها لتطبيق ويب أو لعبة صغيرة بتجرّبها بنفس الصفحة وبتشاركها برابط. متاح لكل مستخدمي Gemini؛ Pro وUltra بيعطوك الموديل الأقوى وسياق أطول.
Colab (colab.research.google.com): دفاتر Python مجانية على سيرفرات Google، مع ميزات AI مفعّلة افتراضياً: توليد وتحويل الكود، «إصلاح الأخطاء بذكاء» مع عرض الفرق، ووكيل علم البيانات. لتحليل البيانات وتجارب الذكاء الاصطناعي. بيحتاج حساب 18+ ولغة مدعومة.
وكيل Android Studio (developer.android.com/gemini-in-android): الوكيل المدمج بـ Android Studio: بيكتب الكود، بيشرح الأخطاء، وبيولّد الواجهات، بدون اشتراك وبحصة محدودة. وصار يقبل وكلاء من برّا (Claude Agent وCodex عبر ACP) ومفاتيح API خاصة بك.
Skills في Gemini (الإعلان الرسمي): أوامر /اسم بتحفظ فيها طريقة شغل (مثلاً: «حوّل أي مقال لخمس أفكار ريلز بأسلوبي») وبتناديها بأي محادثة. هي اللي حلّت مكان Opal وGems. 18+، وحسب مستوى اشتراكك بـ Google AI.

اللي خلص وشو حلّ مكانه

قوائم «أدوات Google المجانية» المنتشرة لسا بتحكي عن هدول التلاتة. بتاريخ 2026-11-01 حالتهم هيك:

الأداة	شو صار	البديل
Gemini CLI	من 18 يونيو 2026 ما عاد فيه مستوى مجاني للأفراد؛ المستودع صار لعملاء Google Cloud والمفاتيح المدفوعة	Antigravity CLI (agy)
Gemini Code Assist للأفراد	إضافات VS Code وJetBrains وقفت تخدم الأفراد من 18 يونيو 2026؛ الرابط القديم بيحوّلك لإشعار الإيقاف	إضافات Antigravity لنفس المحرّرات
Firebase Studio	مغلقة للمستخدمين الجدد من 22 يونيو 2026، وإغلاق كامل مع حذف البيانات بـ 22 مارس 2027	AI Studio Build بالمتصفح أو Antigravity على جهازك
Opal	بتتوقف 17 نوفمبر 2026 (القسم 4)	Skills في Gemini

لو عندك مشروع على Firebase Studio: انقله هلأ، مش بمارس.

من وين تبدأ؟

بدك تبني تطبيق كامل بسرعة

Antigravity على جهازك، أو AI Studio Build بالمتصفح إذا جهازك ضعيف.

بدك تجرّب فكرة بثواني

Gemini Canvas أو AI Studio. ما في تثبيت.

بدك شكل الشاشات

Stitch: وصف أو رسمة، وبتصدّر لـ Figma أو كود.

عندك مشروع على GitHub

Jules للمهام الصغيرة المتراكمة، وبتراجع الـ PR.

بتحب الطرفية أو محرّرك الحالي

Antigravity CLI أو إضافة Antigravity لـ VS Code.

مش مبرمج أصلاً

Gemini Canvas للتطبيقات الصغيرة، وSkills لأتمتة طريقة شغلك.

بتشتغل على Claude Code؟ الفكرة نفسها بالجدول عندي: Claude Code لغير المبرمجين ودليل أوامر Claude Code.

الحدود المجانية بالأرقام

من الصفحات الرسمية بتاريخ 2026-11-01؛ Google بتغيّرها كثير، فافتح صفحة الأسعار قبل ما تبني عليها شغل عميل.

الأداة	المجاني	ملاحظة
Antigravity (تطبيق، IDE، CLI، إضافات)	خطة Free للأفراد: 0$، أكثر من موديل، إكمال Tab بلا حدود	«حدود أسبوعية أساسية» على الوكلاء؛ Pro/Ultra بيرفعوها؛ Business من 30$ للمقعد
AI Studio	مجاني، ومفتاح API بمستوى مجاني	حدود طلبات بالدقيقة واليوم حسب الموديل؛ أول تطبيقين من Build بينتشروا ببلاش
Stitch	مجاني عالمياً	رصيد يومي بيتجدّد؛ ما في رقم رسمي منشور
Jules	15 مهمة باليوم، 3 بنفس الوقت	Pro: 100 / 15 · Ultra: 300 / 60 · عمر 18+
Gemini Canvas	مجاني بتطبيق Gemini	حدود الاستخدام المجاني للموديل
Colab	مجاني، وميزات AI مفعّلة افتراضياً	GPU محدود؛ 18+ ولغة مدعومة؛ باقات Pro للحوسبة
وكيل Android Studio	بدون اشتراك، حصة محدودة	Pro/Ultra بيرفعوا الحصة والسياق
Skills في Gemini	حسب مستوى اشتراكك	18+؛ حلّت مكان Opal وGems
Opal	مجاني لغاية 17 نوفمبر 2026	بالإنجليزي، حساب شخصي، 18+

أخطاء بتضيّع وقتك

تجرّب الـ 11 بنفس اليومبتطلع بدون ولا مشروع خالص.

وحدة من كل فئةوكيل (Antigravity) + نموذج أولي (AI Studio) + صيانة (Jules). الباقي لما تحتاجه.

تثبّت Gemini CLI من قائمة قديمةبتسجّل دخول وبيقلك ما في خطة مجانية.

Antigravity CLIنفس الفكرة، ولسا مجاني.

مهمة ضبابية للوكيل«حسّن المشروع» لـ Jules أو Antigravity بتطلع تغييرات بكل مكان.

مهمة بملف وهدف«ضيف اختبارات لـ tax.ts» أو «صلّح خطأ تسجيل الدخول عند الإيميل الفاضي».

تدمج الـ PR بدون ما تقرأهالوكيل بيغلط بثقة، والخطأ بيوصل للإنتاج.

اقرأ التغييرات وشغّل الاختباراتالوكيل بيوفّر عليك الكتابة، مش المراجعة.

تبني شغل عميل على الحصة المجانيةبنص المشروع بتخلص الحصة الأسبوعية أو اليومية.

افتح صفحة الحدود أولولو الأداة صارت أساسية بشغلك، الباقة المدفوعة أرخص من يوم ضايع.

أسئلة شائعة

كلها بتشتغل من الأردن والدول العربية؟

AI Studio وGemini API بقائمة دولهم الرسمية: الأردن وكل دول الخليج والشام ما عدا سوريا. Stitch بتقول «لكل المستخدمين عالمياً». Antigravity وJules وCanvas ما بينشروا قائمة دول. كلها بتحتاج حساب Google، وJules وColab وSkills وOpal بتطلب عمر 18+ وبعضها حساب شخصي مش حساب عمل. لو طلع «غير متاح ببلدك»، ارجع بعد أسابيع: Google بتوسّع الدول بالتدريج.

أي وحدة أقرب لـ Claude Code؟

Antigravity CLI بالطرفية، وتطبيق Antigravity للوكلاء المتوازيين. الفرق الأساسي عندي: Claude Code أدق بالمشاريع الكبيرة والقواعد (CLAUDE.md)، والمستوى المجاني عند Google أوسع للتجربة. جرّب الاثنين على نفس المهمة الصغيرة وقرّر.

ليش الريل بيحكي عن Opal وهي بتتوقف؟

لما صوّرت الريل كانت شغّالة، وصفحتها هلأ بتعلن التوقف بـ 17 نوفمبر 2026. حطّيتها بالدليل مع البديل (Skills في Gemini) بدل ما أشيلها وأخلّيك تدوّر.

الأدوات هاي رح تبدّل المبرمج؟

بتبدّل الكتابة، مش الفهم. اللي بيعرف شو بده وبيعرف يراجع، بيطلع منها 10 أضعاف. واللي ما بيعرف، بيطلع بتطبيق شكله حلو وجوّاته أخطاء ما بيشوفها.

من وين أخدت القائمة؟

من الصفحات الرسمية لكل أداة وصفحات الأسعار والحدود (فحص 2026-11-01)، والفكرة الأصلية من ريل nick_saraev «10+ free AI coders by Google» (ديسمبر 2025)، وكم أداة من قائمته خلصت من وقتها؛ عشان هيك القسم 7.