شو بيعمل بالضبط؟
01
بيشوف كل صورة
بيفتحها وبيشوف شو فيها، مش بس اسم الملف.
02
بيرتّب بمجلدات
حسب المناسبة أو الموضوع اللي بيلاقيه.
03
ما بيمسح ولا صورة
المكرر بيروح لمجلد «مراجعة»، وإنت اللي بتقرر.
انسخه زي ما هو
نفس البرومت اللي استعملته بالتجربة، حرف بحرف.
1
البرومت كامل، جاهز للنسخ
مرّ على كل صورة بهالمجلد، ورتّبها بمجلدات حسب المناسبة أو الموضوع اللي بتلاقيه (رحلات، أعياد ميلاد، أكل، شغل، سكرينشوت… أو أي موضوع واضح). أي صورة مكررة حطها بمجلد اسمه «مراجعة». لا تمسح ولا صورة. وبالآخر اكتبلي ملخص: كم صورة صار بكل مجلد.
- المواضيع بين القوسين أمثلة: غيّرها حسب صورك (عيلة، أولاد، سيارات…)، وهو بيزيد مواضيع إذا لقى إشي واضح.
- «لا تمسح ولا صورة» أهم جملة بالبرومت. لا تشيلها.
- الملخص بالآخر بيخليك تتأكد إنه ما ضاعت صورة: عدد الصور قبل لازم يساوي المجموع بعد.
طريقتين
الأسهل تطبيق Claude على الكمبيوتر. وإذا عندك Claude Code، نفس البرومت بيشتغل هناك.
2
بتطبيق Claude: Cowork
- افتح تطبيق Claude على الكمبيوتر (ماك أو ويندوز، بآخر نسخة).
- افتح Cowork واختار مجلد الصور. Claude بيشتغل جوّا هاد المجلد بس.
- الصق البرومت واضغط إرسال.
- راجع خطته قبل ما يبلّش. بأول مرة خليه على الوضع اليدوي (Manual): بيوقف وبيستأذنك قبل الخطوات. وأي مسح نهائي بيحتاج موافقتك الصريحة.
الاشتراك: Cowork موجود بالاشتراكات المدفوعة (Pro وMax وTeam وEnterprise)، مش بالمجاني. شرح Cowork كامل بـ دليل Claude Cowork.
3
بـ Claude Code
1. افتح الـ terminal وادخل مجلد الصور:
cd "Pictures/My Photos"
2. شغّل Claude Code:
claude
3. الصق البرومت من الخطوة 1.
- الأذونات: بالوضع العادي Claude Code بيستأذنك قبل ما ينقل أو يعمل مجلدات. بدك يكمّل بدون ما يسألك كل مرة؟ اضغط Shift+Tab لحد ما يطلع accept edits: هيك بينقل جوّا مجلد الصور بس بدون سؤال.
- ما عندك Claude Code؟ التثبيت بخمس خطوات بـ دليل تثبيت Claude Code.
45 صورة مخربطة
صور بأسماء زي IMG_1524.jpg بدون أي ترتيب، وفيها 5 أزواج مكررة.
4
النتيجة بالأرقام
45
صورة دخلت، و45 طلعت
4:33
دقيقة من البرومت للملخص
5
أزواج مكررة لقاها كلها
0
صور انمسحت
| المجلد | العدد | شو فيه |
|---|---|---|
| رحلات | 8 | شواطئ، غروب، قارب ببحيرة، قلعة رمل، طرق جبلية وصحراوية |
| أكل | 8 | منسف، شاورما، بيتزا، كنافة، فطور حمص وفلافل، سمك مشوي، شاي، قهوة |
| أعياد ميلاد وحفلات | 6 | كيكات بشموع، بالونات، طاولة حفلة، كب كيك بحفلة بالحديقة، هدايا ملفوفة |
| شغل | 6 | قاعة اجتماعات، سبورة عليها مخطط، لابتوب ودفتر، عقد ورقي، كروت شغل، فاتورة |
| قطط | 6 | ست صور لقطط |
| سكرينشوت | 4 | خريطة، محادثة، تطبيق تسوق، تطبيق طقس |
| متفرقات | 2 | محطة بنزين بالليل وإشارة مرور تحت المطر: ما لقى لهم موضوع واضح |
| مراجعة | 5 | نسخة وحدة من كل زوج مكرر |
- المكرر: الأزواج الخمسة كانوا متطابقين 100%. خلّى نسخة من كل زوج بمجلد موضوعها، وحط التانية بـ«مراجعة». يعني لو مسحت «مراجعة» كلها، ما بتخسر ولا صورة.
- المجلدات اللي ما طلبتها: «متفرقات» عملها لحاله للصور اللي ما إلها موضوع واضح، بدل ما يحشرها بمكان غلط.
- التكلفة: التجربة كانت بـ Claude Code وموديل Opus 5.5. لو مشترك Pro أو Max، بتنحسب من حدود اشتراكك (نفس الحدود بين Claude وClaude Code)، مش فلوس زيادة. وبسعر الـ API كانت حوالي 2.60 دولار.
5
الصور اللي قرّر مكانها لحاله
أحلى إشي بالملخص إنه حكالي وين تردّد. هاي الصور اللي قرر مكانها بنفسه، بكلامه:
- IMG_1524 (الهدايا): ورق التغليف شكله تبع رأس السنة مش عيد ميلاد بالتحديد، بس حطها بالحفلات.
- IMG_1827 (الكب كيك): فيها ناس بحفلة بالحديقة، فحطها بالحفلات مش بالأكل.
- IMG_7668 (الفاتورة): على مكتب جنب قلم وكاسة، فحطها بالشغل.
- IMG_2073 وIMG_4379 (السمك والكنافة): شكلهم مأخوذين من ستوري، بس موضوعهم أكل فحطهم بالأكل.
اقرأ الملخص قبل ما تمسح إشي: صورة فيها أكل برحلة ممكن تروح للأكل أو للرحلات، وهو بيختار. إذا بدك قاعدة، احكيها بالبرومت: «إذا الصورة فيها أكل برحلة، حطها برحلات».
دقيقة بتوفّر عليك مشاكل
خصوصاً إذا عندك آلاف الصور مش 45.
6
نصايح وأخطاء شائعة
الغلطتعطيه مجلد الصور الأصلي فيه 10,000 صورة من أول مرة، وتمسح «مراجعة» بدون ما تفتحها.
الصحنسخة من المجلد، ودفعة صغيرة أول (50 لـ 100 صورة)، وبعدين بتكبّر. و«مراجعة» بتفتحها بعينك قبل أي مسح.
- اشتغل على نسخة: انسخ المجلد وأعطيه النسخة. لو صار أي إشي، الأصل سليم.
- آلاف الصور؟ قسّمها: مجلد لكل شهر أو سنة، وكل مجلد بجلسة لحاله. بالجلسات الطويلة كتير، لما توصل للحد Claude Code بيشيل أقدم الصور من المحادثة وما بيعود يشوفها، فالدفعات الصغيرة أضمن.
- صور الموبايل: انقلها على اللابتوب أول (من الكيبل أو من Google Photos / iCloud). Cowork وClaude Code بيشتغلوا على ملفات الكمبيوتر.
- الصور الخاصة: الملفات بتضل على جهازك، بس عشان Claude يشوف الصورة لازم تنبعت مشفّرة للموديل. فلا تحط بالمجلد صور هويات أو كشوفات بنك أو أي إشي حساس.
- الأسماء: البرومت ما بيغيّر أسماء الصور، بس بينقلها. بدك أسماء بتوصف الصورة؟ شوف البرومت الأول بالخطوة 7.
7
برومتات زيادة للصور
أسماء بتوصف الصورة (بدل IMG_1524):
غيّر اسم كل صورة بهالمجلد لاسم قصير بالإنجليزي بيوصف شو فيها (مثلاً kunafa-table)، وخلّي الاسم القديم بآخره. لا تنقل ولا تمسح ولا صورة. وبالآخر اعرضلي جدول: الاسم القديم والاسم الجديد.
الصور الضعيفة (ضبابية أو معتمة):
دوّرلي على الصور الضبابية أو المعتمة كتير، وحطها بمجلد اسمه «ضعيفة». لا تمسح ولا صورة. وبالآخر احكيلي ليش اخترت كل وحدة.
أحلى الصور (للبوست أو للطباعة):
اختارلي أحلى 10 صور من مجلد «رحلات» وانسخها (نسخ مش نقل) لمجلد اسمه «أحلى 10». وبالآخر احكيلي ليش اخترت كل وحدة بسطر.
?
أسئلة شائعة
ممكن يمسحلي صور؟
البرومت بيقوله بوضوح «لا تمسح ولا صورة»، وبالتجربة طلعت 45 من 45. وبـ Cowork أي مسح نهائي بيحتاج موافقتك الصريحة. ومع هيك اشتغل على نسخة، وراقب شو بيعمل.
بيشتغل على الموبايل؟
لا، هاد شغل على ملفات الكمبيوتر. انقل الصور على اللابتوب أول، ورتّبها هناك.
قديش بياخد وقت؟
45 صورة أخدت 4:33 دقيقة. الوقت بيزيد مع عدد الصور، لأنه بيفتح كل صورة ويشوفها.
بيفهم العربي؟
تمام. كتبت البرومت بالعربي، والمجلدات طلعت بأسماء عربية زي ما طلبت.
حط صورة بمكان غلط، شو أعمل؟
انقلها بإيدك، أو احكيله القاعدة اللي بدك ياها وخليه يعيد ترتيب هاد المجلد بس. الصور اللي فيها أكثر من موضوع هي اللي بتحيّره.